Klukkan o.fl.

Hér var klukkunni seinkað um helgina þannig að á aðfaranótt sunnudags stóð hún í stað í 02:00 í heilan klukkutíma. Við nýttum aukaklukkutímann með eindæmum vel og steinsváfum. Núna erum við þess vegna átta tímum á eftir ykkur sem veldur ákveðnum vandræðum ef við þurfum að hafa samband við einhvern á skrifstofutíma á Íslandi því þá er annaðhvort að vaka fram á nótt eða rífa sig upp fyrir allar aldir. Annar leiðinlegur fylgikvilli á tímaseinkuninni er að nú dimmir klukkutíma fyrr en í síðustu viku.

Við erum annars bara í ágætu stuði. Höfum brallað mest lítið síðustu daga en einbeitt okkur því meira að náminu. Ekki veitir af því í næstu viku tökum við okkur fjögurra daga frí og skellum okkur til Las Vegas.

Alls staðar verður maður var við að það styttist í jólin, kominn jóladrykkjaseðill á Starbucks, jólaskraut í fullt af búðum og farið að plana jólateiti í vinnunni hjá mér. Það er samt frekar fyndið að hér passa allir sig á því að vera "politically correct" og tala um "the Holidays" frekar en "Christmas" því samkvæmt lögum má jú ekki gera upp á milli trúarbragða. Mér finnst þetta fullkomin hræsni því stjórnmálamenn tala stöðugt um Guð í ræðu og riti. Almenningur má samt alls ekki fara í jólaglögg í vinnunni heldur verður að gera sér hátíðarglögg að góðu. 

Edda 

Athugasemdir

[Jón Sigurður (IP-tala skráð) 9.11.2007 kl. 12:29]

Kanarnir eru náttúrulega meira svona politically irrational en politically correct.

[Lindi (IP-tala skráð) 9.11.2007 kl. 22:38]

Já, annað klikkað dæmi sem er í gangi snýst um "Dog the Bounty Hunter" sem er með einhverja sjónvarpsþætti. Hann var víst staðinn að því að kalla einhvern blökkumann negra og allt varð alveg brjálað. Þátturinn hans tekinn af dagskrá, allir blökkumannaleiðtogar alveg brjálaðir, fjölskyldan hans búin að snúast gegn honum og núna er aumingja kallinn búinn að fara í fullt af sjónvarpsviðtölum hágrátandi og biðjast fyrirgefningar. Alger klikkun.

[Helgi (IP-tala skráð) 10.11.2007 kl. 22:42]

politically irritating... urrrr !!!!

[tinna (IP-tala skráð) 14.11.2007 kl. 15:32]

hahaha, hátíðarglögg. þú ert fyndin Edda !!!

skemmtið ykkur vel í Vegas, hlakka til að heyra af ferðinni. segi einsog Lindi, þetta er einn af þessum stöðum sem maður býst frekar við að sjá bara á skjánum frekar en í real life... er alveg abbó, þetta verður örugglega geðveikt!!!!

kossar og knús frá klakanum.

Tinna.