Yosemite

Helgin nálgast óðfluga og því er ekki seinna vænna en að skrifa ferðasögu síðustu helgar. Við leigðum okkur sumsé bíl (enn einu sinni) og keyrðum á vit ævintýranna í Yosemite þjóðgarðinum (framburður er jósimmetí en ekki jósmæt - hvorugt okkar klikkaði á því ... ahem... ).

Garðurinn er staðsettur um mitt austanvert Kaliforníufylki og tók ferðalagið þangað um fjóra tíma. Við vorum ekki komin á leiðarenda fyrr en að ganga níu og gerðum því lítið annað en að slappa af á hótelherberginu á föstudagskvöldinu. Við áttum í litlum vandræðum með að slaka vel á þar sem herbergið skartaði risa nuddbaðkari sem hægt var að horfa á sjónvarpið úr .

Á laugardeginum hófst svo skoðunarferðin okkar um þjóðgarðinn og urðum við ekki fyrir vonbrigðum. Landslagið var ægifagurt eins og meðfylgjandi myndir bera með sér. Dagurinn fór í að keyra og ganga um garðinn og rákumst við m.a. á bamba en enga birni, þrátt fyrir að þeir séu þekktir fyrir að gera ferðamönnum lífið leitt. 

Við tókum sunnudaginn snemma því við áttum langan dag fyrir höndum. Við byrjuðum á að keyra þvert í gegnum Yosemite og fórum út úr garðinum í rúmlega 10 þúsund feta (3 km) hæð. Þaðan lá leið okkar norður meðfram mörkum Nevada í draugabæinn Bodie sem er stærsti draugabær Kaliforníu. Bærinn iðaði af lífi á gullgrafaraárunum enda í námunda við gjöfular gullnámur. Hann var alræmdur fyrir háa glæpatíðni og er lýst sem "one of the wildest and most lawless town in the West". Til marks um það var áttunda boðorðinu - "thou shall not steal" - snemma stolið af altari kirkju bæjarins. Okkur þótti mjög gaman að skoða Bodie en skiljum vel að íbúar hafi yfirgefið bæinn að loknu gullæðinu. Hitastigið sveiflast nefnilega um tugi gráða yfir daginn, frosthörkur eru miklar á veturna og sumur hrikalega heit. 

 

 

Frá Bodie keyrðum við heim á leið (um 5 tíma akstur) og lentum að sjálfsögðu í nokkrum massívum umferðarteppum á leiðinni.

Stuðkveðjur á klakann...

 

... Edda 

Athugasemdir

[maggi (IP-tala skráð) 26.10.2007 kl. 11:35]

Þið eruð rosa bloggarnar, reglulegir pistlar, myndir og hvaðeina. Líklega "úber bloggarar".

Skemmtilegust fynnst mér samt myndin af Linda við baðið. Ég renndi yfir myndirnar fyrst og hugsaði strax með mér að þetta hlyti að vera eitthvað sögufrægt bað fyrst það var stillt uppí myndatöku við það. Ekki var það svo en skemmtilegt engu að síður.

Jæja, nóg í bili,

M

[Lindi (IP-tala skráð) 26.10.2007 kl. 17:37]

Já baðmyndin er einstaklega skemmtileg. Ástæðu myndatökunnar má rekja til þess að við vorum uppfærð á hótelinu og fengum við því nuddbað í stofuna. Mikil ánægja var með nuddbaðið og í hita leiksins var þessi hressandi mynd tekin.

[Edda (IP-tala skráð) 26.10.2007 kl. 17:47]

Það má heldur ekki gleyma því að við höfum búið við viðvarandi baðskort undanfarin 4 ár þar sem ekki er boðið upp á slíkan lúxus á Stúdentagörðum. Við vorum því eins og börn í nammilandi þegar við uppgötvuðum herlegheitin.

Baðið er því sögulegt í okkar huga, Maggi ;).